စစ်ကိုင်းတိုင်း ကသာမြို့နယ်တွင် ယနေ့ ဇွန်လ ၂၄ ရက်နေ့က ကချင်လွတ်မြောက်ရေးတပ် (KIA) နှင့် စစ်ကောင်စီတပ်တို့ကြား တိုက်ပွဲပြင်းထန်စွာ ဖြစ်ပွားခဲ့ပြီး စစ်ကောင်စီတပ်ဖွဲ့မှ သေဆုံးမှုများရှိကြောင်း သိရသည်။
စစ်ကောင်စီတပ်က ကေအိုင်အေ ထောင်ထားသည့် မြေမြုပ်မိုင်းနင်းမိရာမှ စတင်ပစ်ခတ်ပြီး ယနေ့ နံနက်ပိုင်းမှစတင်ကာ ညနေပိုင်းထိ တိုက်ပွဲဖြစ်ပွားနေခြင်းဖြစ်သည်ဟု အမည်မဖော်လိုသူ ဒေသခံတစ်ဦးက The 74 Media ကိုပြောသည်။
“မနက် ၁၀ နာရီကျော်လောက်က ရွှေကျောင်းကုန်းရွာနား စကစလူတွေက ဒီဘက်က KIA ထောင်ထားတဲ့မိုင်း နင်းမိပြီး လန့်ပြီးတော့ သူတို့ကစပစ်တာ။ ပြီးတော့ နေ့လယ် ၂နာရီလောက်ကလည်းတစ်ကြိမ် ပစ်ကြတယ်။ အဲဒါလည်း နာရီဝက်လောက်ပဲကြာတယ်။ ခုညနေ ၆ နာရီကလည်း တစ်ခါ ပစ်ကြသေးတယ်” ဟုပြောသည်။
တိုက်ပွဲဖြစ်ပွားချိန် စစ်ကောင်စီတပ်မှ ထိခိုက်မှုများသောကြောင့် ပရဟိတကားများ လိုက်ရှာနေကြောင်း အခြားဒေသခံတစ်ဦးက The 74 Media ကိုပြောသည်။
“သူတို့ဘက်က အထိခိုက်များတယ်။ စကစ ဘက်ကမြို့ထဲပြန်ပြေးတာ။ အဲ့မှာက CDMမလုပ်တဲ့ ဆရာဝန်တွေရှိတယ်လေ။ နေ့လယ်ကလည်း ပရဟိတကားရှာနေတယ်ကြားတယ်” ဟုသူကပြောသည်။
ပစ်ခတ်တိုက်ခိုက်မှု ပြန်လည်ဖြစ်ပွားချိန် ညနေ ၆ နာရီခန့်က “ဟိုဘက်က တအားကျတာ။ အခုအလောင်းလာသယ်တာ” ဟုဒေသခံများက ပြောသည်။
စစ်ကောင်စီဘက်မှ အကျအဆုံးနှင့် ပတ်သတ်၍ The 74 Media က သီးခြားအတည်ပြုနိုင်ခြင်း မရှိပါ။
စစ်ကောင်စီတပ်က ရွှေကျောင်းကုန်းမှ မိုးတားဘက်သို့ တပ်ဆုတ်လာပြီး လက်နက်ကြီးများ ရမ်းတမ်း ပစ်ခတ်သောကြောင့် အနီးနားမှ ဒေသခံပြည်သူများက တိုက်ပွဲရှောင်တိမ်းနေရကြောင်း သိရသည်။
သင့်ထင်မြင်ချက်ရေးပေးပါ