မိုးမောက်မြို့နယ်၊ နွမ်လန်းကျေးရွာတွင် စစ်ကောင်စီ၏ တိုက်လေယာဥ်ဖြင့် လေကြောင်းတိုက်ခိုက်မှုကြောင့် နွမ်လန်းဒေသခံ တစ်ဦးသေဆုံးကာ တစ်ဦးဒဏ်ရာပြင်းထန်ခဲ့ကြောင်း သိရသည်။
စစ်ကောင်စီ၏ လေကြောင်းတိုက်ခိုက်ကြောင့် အသက် ၇၂နှစ်အရွယ် ဦးဂျန်မာထွယ်ဝါ သေဆုံးခဲ့ပြီး အသက် ၂၇နှစ်အရွယ် မမရစ်ရွယ်ဆန့်မှာ လက်မောင်း စုတ်ပြတ်ဒဏ်ရာရရှိခဲ့သည့်အပြင် ပေါင်နှစ်ဖက်လုံး ဒဏ်ရာရရှိခဲ့ကြောင်း သွားရောက်ကယ်ဆယ်ခဲ့သူတစ်ဦးထံမှသိရသည်။
”ညနေ ၃နာရီခွဲလောက်ကဖြစ်တာ။ ဆုံးသွားတဲ့ သူရဲ့ မိသားစုဝင်တွေပြောတာ လေယာဥ်ကနေ ဗုံးလာချသွားတဲ့။ ဆုံးသွားတဲ့ အဘိုးက လေဖြတ်နေတာ။ အိမ်ပေါ်ကို လေယာဥ်ဗုံးလာကျတာ” ဟု သူကဆိုသည်။
ဒဏ်ရာရရှိသော အဆိုပါ အမျိုးသမီးအား ဗန်းမော်မြို့သို့ခေါ်ဆောင်သွားကြောင်း သူကဆက်ပြောသည်။
လက်ရှိအချိန်တွင် မိုးမောက်မြို့နယ်အတွင်း KIA တပ်မတော်နှင့် စစ်ကောင်စီတပ် တိုက်ပွဲပြင်းထန်စွာဖြစ်ပွားနေပြီး စစ်ကောင်စီမှ တိုက်လေယာဥ်နှင့် ရဟတ်ယာဥ်များအသုံးပြု၍ တိုက်ခိုက်နေသည်။
သင့်ထင်မြင်ချက်ရေးပေးပါ