ဗလမင်းထင်တံတား အမှတ် (၂ ) စတင်ဆောက်လုပ်ရန် ပန္နက်ရိုက်အခမ်းအနားကို ယနေ့မွန်းတည့် ၁၂ နာရီခန့်က မြစ်ကြီးနားမြို့ စီတာပူရပ်ကွက်တွင် ပြုလုပ်ခဲ့ကြောင်း သိရသည်။
ပန္နရိုက်အခမ်းအနားပြုလုပ်သည့် စီတာပူရပ်ကွက်တွင် ယနေ့နံနက်မှစ၍ လုံခြုံရေးတင်းကြပ်မှုများရှိနေပြီး တံတားတွင်လည်း ဖြတ်သန်းခွင့်မပြုဘဲ ပိတ်ထားသည်ဟု မျက်မြင်တွေ့ရှိသူ တစ်ဦးက The 74 Media ကိုပြောသည်။
“တံတား ပိတ်ထားတာ တစ်နာရီလောက်ရှိပြီ။ လုံခြုံရေးရော တင်းကြပ်ထားတယ် စစ်သားတွေစောင့်နေတယ် ခရီးသွားတွေ ဈေးသည်တွေလည်း စောင့်နေရတယ်”ဟုဆိုသည်။
ထို့အပြင် စီတာပူရပ်ကွက်ရှိ မနောကွင်းအနီးတစ်ဝိုက်တွင်လည်း စစ်ကောင်စီတပ်ဖွဲ့ဝင် စစ်သားနှင့် ရဲများ လုံခြုံရေးယူပြီး စစ်ဆေးမှုများလည်း ပြုလုပ်နေကြောင်း သူကပြောသည်။
ပန္နရိုက်အခမ်းအနားကို ကချင်ပြည်နယ်စစ်ကောင်စီ ဥက္ကဌ ဦးခက်ထိန်နန်နှင့် စစ်ကောင်စီတပ်ဖွဲ့ဝင်များ တက်ရောက်ခဲ့ပြီး မွန်းလွဲ ၁၂ နာရီခွဲတွင် အခမ်းအနားပြီးဆုံးသွားကြောင်းသိရသည်။
မြစ်ကြီးနားမြို့နှင့် ဝိုင်းမော်မြို့ကို ဆက်သွယ်ထားပြီး လက်ရှိအသုံးပြုနေသော ဗလမင်းထင်တံတားကို ၁၉၉၅ ခုနှစ် ဩဂုတ်လက စတင် ဆောက်လုပ်ခဲ့သည်။
ယခု စတင်တည်ဆောက်တော့မည့် ဗလမင်းထင်တံတား အမှတ်(၂) ကိုမူ ဗလမင်းထင်တံတား၏ အောက်ဘက်တွင် တည်ဆောက်သွားမည်ဖြစ်သည်။
================
လွတ်လပ်တဲ့သတင်းမီဒီယာအဖြစ် ဆက်လက်ရပ်တည်နိုင်ရန် နည်းများမဆိုလှူဒါန်းနိုင်ပါတယ်။ လှူဒါန်းလိုတယ်ဆိုရင် ဒီလင့်ခ်ကို နှိပ်ပါ – https://bit.ly/3vPLY7e