ကယားပြည်နယ်၊ လွိုင်ကော်မြို့နယ်၊ လွိုင်လင်လေးကျေးရွာအရှေ့ဘက်ခြမ်းတွင် ယနေ့ညနေ ငါးနာရီခန့်၌ စစ်ကောင်စီတပ်ဖွဲ့နှင့် ကရင်နီတပ်မတော် KNDF၊ PDF ပူးပေါင်းတပ်ဖွဲ့တို့အကြား တိုက်ပွဲဖြစ်ပွားစဥ် စစ်ကောင်စီတပ်ဖွဲ့ဝင်များ လက်နက်ချထွက်ပြေးခဲ့ကြောင်းသိရသည်။
စစ်ကောင်စီတပ်နှင့် တစ်နာရီခန့်တိုက်ပွဲဖြစ်ပွားခဲ့ရာ လက်နက်ခဲယမ်းများ သိမ်းဆည်းရမိကြောင်း ခိုင်မာသောသတင်းရင်းမြစ်တစ်ဦးက The 74 Media ကိုပြောသည်။
“ညနေက KNDF နဲ့ PDF တွေပေါင်းပြီး ပြန်ပစ်တယ်ကြားတယ်။ အချိန်တော့ သိပ်မကြာလိုက်ပါဘူး။ တစ်နာရီဝန်းကျင်လောက်နဲ့ ငြိမ်သွားတယ်။ လက်နက်တွေ သိမ်းဆည်းရမိတယ်” ဟုပြောသည်။
တိုက်ပွဲအတွင်း စစ်ကောင်စီတပ်များ သေဆုံးခဲ့ပြီး မည်မျှသေဆုံးသွားသည်ကိုတော့ အတိအကျမသိကြောင်းသူကပြောသည်။
တိုက်ပွဲအတွင်း စစ်ကောင်စီတပ်မှ စစ်သားအချို့ လက်နက်ချကာ ထွက်ပြေးမှုများလည်းရှိကြောင်း သူကဆက်ပြောသည်။
ထို့အပြင် လွိုင်ကော်မြို့နယ် ဒေါတဟေးကျေးရွာအနီးတွင် ယမန်နေ့က ဖြစ်ပွားခဲ့သော တိုက်ပွဲတွင်လည်း လက်နက်ငယ် (၃) လက်၊ ကျည်ဆံနှင့် စစ်အသုံးအဆောင်ပစ္စည်းအချို့တို့ကို သိမ်းဆည်းရမိကြောင်းသိရသည်။
ကယားပြည်နယ်တွင် မေလမှစ၍ စစ်ကောင်စီနှင့် KNDF တို့ကြား တိုက်ပွဲများ စတင်ဖြစ်ပွားခဲ့ပြီး ဇွန်လတွင် အပစ်အခတ်ရပ်စဲရေး သဘောတူညီမှုရယူခဲ့သော်လည်း ဩဂုတ်လဆန်းတွင် တကျော့ပြန်တိုက်ပွဲများ ပြန်လည်ဖြစ်ပွားလာခဲ့သည်။
သင့်ထင်မြင်ချက်ရေးပေးပါ