ကချင်ပြည်နယ်၊ မြစ်ကြီးနားမြို့ရှိ ဖိနပ်အရောင်းဆိုင်များတွင် စစ်သုံးပွိုင့်ဖိနပ်များ ရောင်းချခြင်းမပြုရန် စစ်ကောင်စီက တားမြစ်ထားကြောင်း သိရသည်။
မြစ်ကြီးနားမြို့ရှိ စျေး(၁) နှင့် ဈေး (၂) အတွင်းရှိ ဖိနပ်ဆိုင်များ၊ မြို့တွင်းရှိ အခြားဖိနပ်ဆိုင်များ စုစုပေါင်း ၈ ဆိုင်ထက်မနည်းကို The 74 Media က လိုက်လံမေးမြန်းခဲ့ရာ ပွိုင့်ဖိနပ် ရောင်းချခြင်းမပြုရန် စစ်ကောင်စီက တားမြစ်ထားကြောင်း စုံစမ်းသိရှိရသည်။
“အဲ့ဖိနပ်တွေသိမ်းထားတာ ကြာပြီ။ မရောင်းခိုင်းလို့လေ။ ခါတိုင်းကတော့ ရောင်းတယ်။ မရောင်းခိုင်းတာကြာပြီ ဒီနိုင်ငံရေးအခြေအနေကြောင့် နေမှာပေါ့” ဟု ဖိနပ်ဆိုင်ပိုင်ရှင်တစ်ဦးက The 74 Media ကိုပြောသည်။
လက်ရှိနိုင်ငံရေးအခြေအနေကြောင့် စစ်ကောင်စီမှ လိုက်လံတားမြစ်ထားခြင်းဖြစ်နိုင်သည်ဟု အမည်မဖော်လိုသူ သတင်းရင်းမြစ်တစ်ဦးက The 74 Media ကိုပြောသည်။
“အဓိကက တောကလူတွေနဲ့ ဆက်စပ်မှုရှိမှာစိုးလို့နေမှာ။ ပွိုင့်ဖိနပ်က စစ်အသုံးအဆောင်ဖြစ်ပြီး စစ်သား တစ်ယောက်မှာ မရှိမဖြစ်လိုအပ်တဲ့ ဖိနပ်ဖြစ်နေတော့ မရောင်းခိုင်းတာကြာပြီလို့လည်း ကြားရတယ်။ ခါတိုင်းရောင်းနေကျဆိုင်တွေမှာတောင် ပွိုင့်ဖိနပ်မရှိနေဘူး။ မရောင်းခိုင်းတာကတော့ စစ်တပ်ကဟုတ်တယ်” ဟု ပြောသည်။
ပွိုင့်ဖိနပ်သည် စစ်ဘက်ဆိုင်ရာအသုံးအဆောင် ပစ္စည်းတစ်ခုဖြစ်သော်လည်း တောင်ယာလုပ်ကိုင်သူများ၊ တောလိုက် မုဆိုးများ၊ ရွှေမှော်များ၊ ကျောက်စိမ်းမှော်များ နှင့် တောင်တက်သူများလည်း အသုံးပြုကြောင်း သူကဆက်ပြောသည်။
စစ်ကောင်စီက ပွိုင့်ဖိနပ်များ ရောင်းချခြင်းမပြုရန် ဖိနပ်ဆိုင်များကို ရုံးစာ (သို့မဟုတ်) နှုတ်မိန့်ဖြင့် မည်ကဲ့သို့တားမြစ်ထားသည်ကို The 74 Media က ဆက်လက်စုံစမ်းနေဆဲဖြစ်သည်။
မြစ်ကြီးနားမြို့တွင် လက်ရှိအချိန်၌ ပွိုင့်ဖိနပ် တစ်ရံလျှင် ငါးထောင်ကျပ် ဝန်းကျင်ဖြစ်ကြောင်းသိရသည်။
မြန်မာနိုင်ငံတွင် ပွိုင့်ဖိနပ်အဖြစ်လူသိများသည့် စစ်ဖိနပ်သည် တရုတ်ပြည်သူ့လွတ်မြောက်ရေးတပ် (PLA) က ၁၉၆၅ ခုနှစ်တွင် စတင်အသုံးပြုခဲ့သည့် PLA Liberation Shoe ဖြစ်သည်။
သင့်ထင်မြင်ချက်ရေးပေးပါ