ကချင်ပြည်နယ်၊ မိုးညှင်းမြို့ စိမ်းရတနာမွန်ရပ်ကွက်မြောက်ပိုင်းတွင်နေထိုင်သော လူငယ်ငါးဦးကို ဇွန် ၂၄ရက်နေ့ မွန်းလွဲနှစ်နာရီခန့်က စစ်ကောင်စီတပ်ဖွဲ့မှ ဖမ်းဆီးခေါ်ဆောင်သွားကြောင်း သိရသည်။
အဆိုပါ လူငယ်ငါးဦးကို အမည်နှင့် လိပ်စာအတိအကျဖြင့် လာရောက်ရှာဖွေ၍ ဖမ်းဆီးခေါ်ဆောင်သွားခြင်းဖြစ်သည်ဟု နီးစပ်သူတစ်ဦးက The 74 Media ကိုပြောသည်။
“စိမ်းမြောက်မှာ ငါးယောက်အဖမ်းခံရတာက ဟုတ်တယ်။ အဲ့နေ့ မနက်ပိုင်းက တစ်ယောက်ကို အရင်မိတာ။ တိတိကျကျကိုလာဖမ်းသွားတာ။ ဖုန်းစစ်ကြည့်တော့ တစ်ခုခုတွေ့သွားပုံရတယ်။ သူ့ကိုရိုက်စစ်ရင်းနဲ့ ဆက်စပ်ရာကို ပြန်လိုက်တာပါ။ ကျန်တဲ့သူတွေက နေ့လယ်မှာ အဖမ်းခံလိုက်ရတာ”ဟု ပြောသည်။
အဆိုပါလူငယ်များအား သပိတ်တွင်ပါဝင်သည်ဟုစွပ်စွဲကာ စစ်ကြောရေးသို့ခေါ်ဆောင်သွားသည်ဖြစ်ပြီး နှိပ်စက်ခံနေရကြောင်း သူကဆက်ပြောသည်။
ဖမ်ဆီးခံရသူ လူငယ် ငါးဦးသည် မည်သူမည်ဝါဖြစ်ကြောင်းကိုမူ The 74 Media က မသိရှိသေးပါ။
မိုးညှင်းမြို့တွင် စစ်ကောင်စီတပ်ဖွဲ့မှ ဆန္ဒပြသပိတ်တွင် ပါဝင်သည့်ပြည်သူများအား လိုက်လံရှာဖွေဖမ်းဆီးခြင်းများပြုလုပ်နေကြောင်း သိရသည်။
သင့်ထင်မြင်ချက်ရေးပေးပါ