ကချင်ပြည်နယ်၊ ဗန်းမော်မြို့နယ်အတွင်းရှိ ကျောက်တွင်းကျေးရွာနှင့် မြလယ်ကျေးရွာတွင် ယနေ့နံနက် ရှစ်နာရီခန့်မှစ၍ KIA နှင့် စစ်ကောင်စီတပ်တို့ တိုက်ပွဲဖြစ်ပွားခဲ့ကြောင်း ဒေသခံများထံမှသိရသည်။
စစ်ကောင်စီတပ်ဖွဲ့ဝင်များသည် ဗန်းမော်မြို့ဘက်သို့ သင်္ဘောဖြင့် ဆန်တက်လာချိန် KIA မှ ပစ်ခတ်ခြင်းကြောင့် တိုက်ပွဲဖြစ်ပွားခဲ့ခြင်း ဖြစ်သည်။
တိုက်ပွဲအတွင်း မြလယ်နှင့် စင်းခန်းကြား၌ တပ်စွဲထားသည့် စစ်ကောင်စီဘက်မှလည်း ပစ်ကူပေးခဲ့ကြောင်းမျက်မြင်တွေ့ရှိသူ တစ်ဦးက The 74 Media ကိုပြောသည်။
“ဗန်းမော်ကိုတက်လာတဲ့သင်္ဘော ကျောက်တွင်းမှာ မနက် ရှစ်နာရီလောက်ကနေ စပစ်တယ်။ KIA တွေရော စစ်တပ်ရော နှစ်ဖက်ပစ်ကြတာ။ စစ်တပ်ဘက်က ရွာထဲကနေလည်း ပစ်ကြတယ်။ မြလယ်ရွာကသူတွေတောင်ပြေးကြရသေးတယ် ” ဟုပြောသည်။
တိုက်ပွဲနှင့်ပတ်သက်ပြီး နှစ်ဖက်အထိအခိုက်၊ အကျအရှုံးကိုမူ The 74 Media က သီးခြားအတည်ပြုနိုင်ခြင်းမရှိသေးပါ။
ဗန်းမော်မြို့နယ်၊ မြလယ်ရွာကျေးရွာအလွန်နှင့် စင်းခန်းကျေးရွာ ပတ်ဝန်းကျင်၌ စစ်ကောင်စီတပ်ဖွဲ့ဝင် တစ်ရာဝန်းကျင် တပ်စွဲထားကြောင်းသိရသည်။
ပုံ / ဇွန်လ ၂ ရက်နေ့က ရွှေကူမြို့နယ်တွင် ကေအိုင်အေက ပစ်ခတ်ခဲ့သော စစ်ကောင်စီသင်္ဘော။
သင့်ထင်မြင်ချက်ရေးပေးပါ