ကချင်ပြည်နယ်၊ မိုးကောင်းမြို့ အိုးတန်းရပ်ကွက်၊ ကျွန်းတောတံတားအနီး စစ်ကောင်စီတပ်ဖွဲ့ဝင်များက လူငယ်တစ်ဦးကို ယမန်နေ့ည ၈ နာရီခန့်တွင် ဖမ်းဆီးသွားကြောင်း သိရသည်။
စစ်ကောင်စီတပ်ဖွဲ့ဝင်များသည် လက်နက်အပြည့်အစုံဖြင့် လမ်းသွားလမ်းလာများကို စစ်ဆေးသော်လည်း ထိုလူငယ်တစ်ဦးကိုသာ ဖမ်းဆီးသွားခြင်းဖြစ်ကြောင်း အမည်မဖော်လိုသူ မျက်မြင်တစ်ဦးမှ The 74 Media ကိုပြောသည်။
“အဲ့ကောင်လေးကို ဘာကြောင့်ဖမ်းလဲတော့ မသိဘူး။ တခြားသူတွေကိုလည်း စစ်ဆေးနေတာပဲ။ စစ်ပြီးပြန်လွတ်ပေးနေတာ။ သူ့ကိုပဲ မလွတ်ပေးဘဲ ဖမ်းခေါ်သွားတာ”ဟုပြောသည်။
အဖမ်းခံရသည့် လူငယ်မှာ နန့်ရင်းရပ်ကွက်မှဖြစ်ပြီး မည်သည့်နေရာသို့ ဖမ်းဆီးခေါ်ဆောင်သွားသည်ကို မသိကြောင်း ပြောသည်။
ထိုဖြစ်စဉ်မဖြစ်ပွားမီ ည ၇နာရီခန့်က လူငယ်သုံးဦးမှာ ဆိုင်ကယ်တစ်စီးဖြင့် သပိတ်သီချင်းအား ဆောင်းဘောက်ဖြင့်ဖွင့်ကာ သီချင်းအော်ဆိုပြီး လှည့်လည်နေသည်ကို စစ်ကောင်စီတပ်ဖွဲ့ဝင်များမှ သေနတ်ဖြင့်လိုက်လံပစ်ခတ်ခဲ့သည်။
စစ်ကောင်စီတပ်ဖွဲ့ဝင်များသည် မိုးကောင်းမြို့တော်ခန်းမ၊ ဘုန်းကြီးကျောင်းနှင့် စာသင်ကျောင်းများတွင် တပ်စွဲထားသောကြောင့် မြို့သူမြို့သားများ ကန့်ကွက်မှုများရှိနေပြီး တပ်စွဲထားသည်မှာ တစ်လနီးပါးရှိပြီဟုသိရသည်။
သင့်ထင်မြင်ချက်ရေးပေးပါ