ကချင်ပြည်နယ်၊ အင်ဂျန်းယန်မြို့နယ်၊ ဇွပ်မိုင်ယန်ကျေးရွာ ၁၆ မိုင်တွင် စစ်ကောင်စီတပ်ဖွဲ့နှင့် KIA တပ်ဖွဲ့တို့ ယနေ့ နံနက် ၅နာရီအချိန်မှစတင်ပြီး တိုက်ပွဲဖြစ်ပွားခဲ့ကြောင်း သိရသည်။
စစ်ကောင်စီတပ်ဖွဲ့များက ထိုးစစ်ဆင်လာသောကြောင့် ယခုကဲ့သို့ တိုက်ပွဲဖြစ်ပွားခဲ့ခြင်းဖြစ်ကြောင်းသိရသည်။
တိုက်ပွဲဖြစ်ပွားသော အဆိုပါဒေသသည် KIAအဖွဲ့၏ တပ်မဟာ (၁) ၊တပ်ရင်း (၄) ထိန်းချုပ်နယ်မြေဖြစ်ပြီး နှစ်ဖက်အကျအရှုံးကို The 74 Media က မသိရှိသေးပါ။
ပြီးခဲ့သည့် ဧပြီလက အင်ဂျန်းယန်မြို့နယ်မှ KIA နှင့်စစ်ကောင်စီတပ်ဖွဲ့ဝင်များ တိုက်ပွဲ ဖြစ်ပွားသောကြောင့် ဒေသခံပြည်သူအချို့မှာ မြစ်ကြီးနားမြို့သို့တိမ်းရှောင်နေပြီး အချို့ဒေသခံများမှာ တောအတွင်း တဲများထိုးကာ စစ်ရှောင်နေကြသည်။
ထို့အပြင် မိုးမောက်မြို့နယ် မြို့သစ်ကျေးရွာအနီးရှိ အလော့ဘွမ်တွင်လည်း ယနေ့နံနက် ၈ နာရီဝန်းကျင်မှ တိုက်ပွဲများဖြစ်ပွားနေပြီး မွန်းလွှဲချိန်ခန့်တွင် စစ်ကောင်စီတပ်ဖွဲ့ဝင်များမှ လေယာဉ်များအသုံးပြု၍ လာရောက်တိုက်ခတ်နေကြောင်း သိရသည်။
Photo Credit – ပုံဟောင်းအသုံးပြုထားသည်
သင့်ထင်မြင်ချက်ရေးပေးပါ