ကချင်ပြည်နယ်၊ ဟိုပင်မြို့ရှိ ကျောင်းသားကျောင်းသူ ၂၀၀၀ ကျော်ရှိသည့်
အထက်တန်းကျောင်း (ဟိုပင်) တွင် ယနေ့ ကျောင်းစတက်သူ ၂၀၀ ကျော်ရှိကြောင်းသိရသည်။
ဟိုပင် အ.ထ.က ကျောင်းတွင် ကျောင်းလာတက်သူအများစုသည် တပ်မတော်ထောက်ခံသူများနှင့်
မြို့ပေါ်နေထိုင်သူအချို့ဖြစ်ကြသည်ဟု အမည်မဖော်လိုသူ ပညာရေးဝန်ထမ်းတစ်ဦးက The 74 Media ကို ပြောသည်။
“တပ်မတော်ထောက်ခံတဲ့သူတွေ၊ မြို့ပေါ်က လူတွေ အများစု လာအပ်တာ ၊ မူလွန်တို့၊ လခွဲတို့ ၊မူကျောင်းတွေက
ရုံးခန်းတွေဘဲ ဖွင့်ပြီး သန့်ရှင်းရေး လုပ်နေကြတယ်”ဟု ပြောသည်။
ဟိုပင်မြို့ရှိအခြားအထက်တန်းကျောင်းတစ်ခုဖြစ်သည့် အ.ထ.က (စက်ကုန်း) ကျောင်းတွင်
ကျောင်းတက်သူ စုစုပေါင်း ၃၀ဦးခန့်ရှိကြောင်းသူက ဆက်ပြောသည်။
ဟိုပင်မြို့ရှိ အခြေခံပညာရေးကျောင်းများတွင် စစ်ကောင်စီတပ်ဖွဲ့ဝင်များက နေရာယူထားသည်ဟု သိရသည်။
ဟိုပင်မြို့တွင် အ.ထ.ကကျောင်း သုံးကျောင်း ရှိ၊ မူလတန်းလွန်ကျောင်း သုံးကျောင်း ၊ မူလတန်းကျောင်း ငါးကျောင်း ရှိပြီး
ယခင်နှစ်က ကျောင်းတက်သူ စုစုပေါင်း ကျောင်းသား ၅ထောင်ကျော် ရှိသည့် မြို့ဖြစ်သည်။
ကချင်ပြည်နယ်၊ ဟိုပင်မြို့တွင် မေလ ၂၄ ရက်နေ့မှစတင်ပြီး စစ်ကောင်စီ၏ စေခိုင်းမှုဖြင့်
CDMတွင်မပါဝင်သော ဆရာ၊ဆရာမများက ကျောင်းအပ်လက်ခံနေမှုများ ပြုလုပ်ခဲ့ကြသည်။
ပုံ / ဟိုပင်မြို့ အထက စက်ကုန်းစာသင်ကျောင်းရှေ့မြင်ကွင်း။
သင့်ထင်မြင်ချက်ရေးပေးပါ