မြစ်ကြီးနားမြို့တွင် မတ်လ (၂၉) ရက်နေ့တွင် ဖမ်းဆီးခံရသည့် The 74 Media နှင့် Kachinwaves မှသတင်းထောက်နှစ်ဦးကို တပ်မတော်အကြည်အညိုပျက်စေမှု ရာဇသတ်ကြီး ဥပဒေပုဒ်မ ၅၀၅ (က) ဖြင့် ယနေ့အမှုဖွင့်လိုက်သည်ဟု သိရသည်။
The 74 Media မှသတင်းထောက် မချန်ဘူ နှင့် Kachinwaves မှ ကိုလရော်တို့နှစ်ဦးကို မြစ်ကြီးနားမြို့ အမှတ် ၁ ရဲစခန်းတွင် ဖမ်းဆီးချုပ်နှောင်ထားပြီး မနက်ဖြန်ထောင်ကြီးသို့ ပို့ဆောင်မည်ဖြစ်သည်ဟု The 74 Media မှ တာဝန်ရှိသူတစ်ဦးက ပြောသည်။
“မနက်ဖြန် ထောင်ကြီးကို ပို့မယ်လို့ သိရတယ်။ ပုဒ်မ ၅၀၅ (က) ပါ၊ ဒီနေ့ပဲအမှုဖွင့်လိုက်ပါတယ်” ဟု ပြောသည်။
သတင်းထောက်များကို ဖမ်းဆီးခြင်းသည် ပြည်သူကို အမှန်တရားမသိရှိစေလို၍ဖမ်းဆီးအမှုဖွင့်ခြင်းဖြစ်သည်ဟု သူက ဆက်ပြောသည်။
“ကျွန်တော်တို့ သတင်းတိုက်က သတင်းထောက်ကို အမှုဖွင့်တာဟာ သတင်းဌာနကိုပဲ ခြိမ်းခြောက်နေတာမဟုတ်ပါဘူး၊ အမှန်တရားကို ခြိမ်းခြောက်နေတာပါ၊ ပြည်သူတွေ သတင်းမှန်သိမှာကို စိုးရိမ်တဲ့အတွက် သတင်းထောက်တွေကို ဖမ်းဆီးအမှုဖွင့်နေတာလို့မြင်ပါတယ်” ဟု ဆိုသည်။
ပုဒ်မ ၅၀၅ (က) မှာ အာမခံပေးလေ့မရှိဘဲ အချုပ်ဖြင့် အမှုရင်ဆိုင်ရသည့် ပုဒ်မဖြစ်ပြီး အမြင့်ဆုံးပြစ်ဒဏ် ထောင်ဒဏ်နှစ်နှစ်အထိ ချမှတ်ခံရနိုင်သည်။
သင့်ထင်မြင်ချက်ရေးပေးပါ